Zer jan

Ajoarriero

Nafarroak ez du itsasorik, gutxigatik. Horregatik ez dugu arrain plater handirik. Nafarroako sukaldaritzan gehien erabiltzen diren arrainak bakailao lehorra eta amuarraina dira.

Ajoarrieroa bakailao gezitua eta apurtua, piper gorriak eta tomatearen nahaste modukoa da. Iruzurgileren batek patata ere jartzen dio. Platerean jatekoa bada ere, kriston merienda izaten da zezenketara ogitartekoan eramateko.

Ogitartekoan janen baduzu, garrantzitsua da konfiantzazko norbaitek egindakoa izatea, zeren bestela, eztarrian hezur bat gelditzen ahal baitzaizu zeharka, hortzetarako zotza jan izan bazenu bezala.
Bakailaoa oso ongi gezatua ez badago eta zezenketara ogitartekoan badaramazu, kriston mozkorra harrapatuko duzu
.

Zer edan

Garagardoa

Oso edari estimatua bero egiten duen egunetan. Kalimotxoa bezala, Jende gehienak Katxietan eskatzen du, litro ¾ko plastikozko edalontzi handia. Benetan zerbezak eta diren zerbeza motak maite badituzu, ez ezazu eskatu garagardo katxirik garagardotegia ez den lekuan.

Sanferminetan edan ohi den kupeleko garagardoa urtearen beste edozein egunetakoa baino txarragoa eta garestiagoa izaten da. Gainera, kupeleko garagardo txarrak buruko mina ematen du, neuri behintzat, eta batzuetan usai txarra izaten du.

Sanferminetako jendaila

Jainkotiarrak

Entzierroan korritzen duten adituak izaten dira. Bi motatakoak daude: betidaniko anonimoak eta entzierroko Michael Jacksonak. Anonimoek aingeruek bezala lasterka egiten dute zezenen adarren aurrean. Badute halako bokazio transzendentala eta txikitatik ehundaka karreratan ibiliak dira.

“Showmen”ak ongi korritzen dute, baina kirol marka baten propaganda duen txandala ekartzea besterik ez dute behar. Gainerakoa introspekzio eta luzamendu saioak izaten dira goizeko 6etatik entzierroaren ordura arte. Ondoren: gosaldu, telebistan agertu diren ikusi, eta etxean bildu biharamunera arte.