|
Zer jan
Txingarrak tomatearekin
Urdaiazpiko ondu xerrak zartaginetik arinki pasatu eta tomate
saltsan dira. Urdaiazpiko frijituaren gatzak agian beharrezkoa
baino gehiago edatera bultzatuko zaitu. Sanferminetan plater
hau entzierroaren ondoren hamaiketakoa egiteko eta zezenketa
bitartean amorru biziz jaten da.
Ogitartean ere ona da, baina hortzak zorrotz ez badituzu,
lehenbiziko koskadan ogitartekoaren urdaiazpiko osoa aterako
duzu. Ahotik zintzilik dagoela zaila izaten da erabakitzea
zer egin urdaiazpikoarekin. Ez ezazu inoiz urdaiazpiko osoa
ahoan batera sartu, azken juizioaren egunera arte murtxikatzen
ibil zaitezke.
Gauza guztietan bezala, ematen dizuten urdaiazpikoa ona zein
txarra izan daiteke. Leku batzuetan ematen dizuten urdaiazpikoarekin
sokak egin ahal dituzu. |
|
Zer edan
Sangria
Giri batek Iruñera
sanferminetan estreinakoz iristean egiten duena, hegazkinetik
jeitsi eta taxi bati deitu baino lehen sangria botila bat
eskatzea izaten da. Bataio modukoa izaten da.
Uste dute Iruñean sanferminetako edari nazionala
dela, eta izatez, zezenketetan soilik edaten da. Funtsean
ardoz osatzen da, eta ura, limoi zukua eta azukrea gehitzen
zaio. Bestalde badira interpretazio anitz: vodkaz, kanelaz,
ronez, mertxikaz, e.a.
|
|
Sanferminetako jendaila
Kaskarroa
Fama txarra dute
Iruñeko jendearen artean. Giri (atzerritar) maiteen
bertsio txarra bezalakoak dira, inoiz geure auzoetakorik
ere ikusi den arren. Borondate onekoak direlakoan gaude,
xelebre izan nahi dute baina beren metodoekin ez dute asmatzen
edo bestela ez dute jakingo zehazki jaia zertan den.
Beren zaletasunen artean nagusi eta haurrenganako begirunerik
eza eta hiri altzariak triskatzea daude. Entzierroa bezalako
une berezietan ere jarduten dute. Ibilbidean zehar mandeuliak
bezala joaten dira telebista kamarek eman dezaketen famaren
usainera, atzetik datorkien 650 kiloko zezenari arretarik
jarri gabe. San Ferminek kexa bat baino gehiago aurkeztu
die agintariei. Entzierroaren mirari zerbitzuak gainezka
daudela hainbeste alprojarekin..
|
